Кыргызстан Россиядан бюджетти колдоого 10 млн доллар алат
Кыргызстан бюджетти колдоо үчүн Россиядан 10 млн доллар грант алат. Бул тууралуу Тышкы иштер министри Жээнбек Кулубаев маалымат жыйында билдирди.
Кулубаевдин айтымында, акча күзүндө келе баштайт. Министр ошондой эле Россия Кыргызстанга 8 млн долларга өрт-куткаруу техникасын берерин да билдирди.
Эске салсак, февраль айында министрлер кабинетинин төрагасы Акылбек Жапаров РФнын премьер-министри Михаил Мишустинге өткөн жылдын аягында көрсөтүлгөн каржылык жардам үчүн ыраазычылык билдирген. Жапаровдун билдиргенине таянсак, Россия бюджетти колдоо үчүн 10 млн доллар бөлгөн. Россиялык басылмалардын маалыматы боюнча, бул каражат 2022-жылдын 31-мартына чейин келиш керек болчу.
Белгилей кетсек, министрлер кабинетинин расмий сайтында КР жана РФнын өкмөт башчыларынын жолугушуусу тууралуу билдирүүдө бюджеттик колдоо тууралуу эч нерсе айтылган эмес. Бул тууралуу кыргыз басылмалары россиялык расмий булактардан билишти.
Кеп ошол мурдагы берилиш керек болгон каражаттар жөнүндө болуп жатабы же РФнын өкмөтүнөн жаңы колдоо келеби министр ал тууралуу так маалымат берген жок.
