Адылбек Касымалиев: 2025-жылы Ош облусуна 8,543 млрд сом бөлүндү
2025-жылы капиталдык салымдар беренеси боюнча мамлекет Ош облусуна 8,543 млрд сом бөлгөн, анын 8,1 млрд сому толук каржыланган, деп билдирди Министрлер Кабинетинин Төрагасы Адылбек Касымалиев Ош облусуна болгон иш сапарынын алкагында өткөрүлгөн коллегияда. Бул каражат 357 объектке жумшалды.
Анын ичинен 242 социалдык объектке багытталган: 133 мектеп, 57 бала бакча, 17 саламаттыкты сактоо жана 35 маданият жана спорт комплекстеринде курулуш жана ремонт иштери жүргөн. Жалпысынан бул максатка 3,7 млрд сом каралган.
Инфраструктуралык объекттерге, анын ичинде 82 автожолго 4,348 млрд сом, Өзгөн–Мырзаке–Кара-Кулжа жолуна 2,2 млрд сом, таза суу жана ирригациялык объекттерге 317,9 млн сом бөлүнгөн. Ош облусунун жергиликтүү бюджеттерине трансферт катары 1,329 млрд сом бөлүнүп, республикалык бюджеттен жалпысынан 11 млрд сом кирген.
МинКаб Төрагасы облус бюджетинин 2025-жылы 6,447 млрд сомго жеткенин, 2024-жылга салыштырмалуу 2,3 млрд сомго көбөйгөнүн белгиледи. Бирок өндүрүмдүүлүк Талас облусуна салыштырмалуу аз: Таласта 51 млрд сом, Ошто 22,8 млрд сом түзгөн.
Адылбек Касымалиев бир катар тапшырмаларды берди: өнөр жай продукциясын жогорулатууну, экспортту көбөйтүүнү, мамлекеттик-жеке өнөктөштүк долбоорлорун кеңейтүүнү, инвесторлорго ыңгайлуу шарт түзүүнү жана токтоп турган өндүрүш ишканаларын жандандырууну баса белгиледи.
Жыйынтыгында 2025-жыл үчүн Өзгөн жана Чоң-Алай райондору “жакшы”, ал эми жалпы Ош облусу “канааттандырарлык” деген баа алды.
