Долларды нак акчага айландырууда алынган комиссиянын өлчөмүн банктар өздөрү бекитет - Улуттук банк
Улуттук банк, бүгүн, 28-июлга карата банк секторундагы жана валюта рыногундагы жагдай тууралуу кенен маалымат берди.
Анда регулятор банктардын маалыматтарына ылайык, АКШ долларын нак акчага айландыруу үчүн комиссиянын минималдуу өлчөмү нак акчага айландырылып жаткан чет өлкө валютасынын суммасынан 0.4%, ал эми максималдуу өлчөмү 5%ды түзөрүн айтат.
“Мында банк мыйзамдарында банктар тарабынан керектөөчүлөр үчүн маалыматтардын ачык-айкындулуугун жана жеткиликтүүлүгүн камсыз кылуу менен, өз кызмат көрсөтүүлөрү үчүн комиссиялык сый акылардын жана тарифтердин өлчөмүн өз алдынча белгилөө каралган”, – дейт Улуттук банк.
Ошондой эле өлкөнүн башкы банкы нак чет өлкө валютасынын жетишсиздиги шартында коммерциялык банктар тарабынан, өз ишинде тобокелдиктерди төмөндөтүү жана кардарлар алдындагы милдеттенмелерин аткаруу максатында, АКШ долларынын зарыл көлөмү менен камсыз кылуу жагында иштер жүргүзүлүп жатканын жана алып-сатарлык операцияларынын көбөйүп жаткандыгын эске алып, нак АКШ долларын берүү/алмаштыруу суммасы боюнча чектөөлөр киргизилип жана/же кошумча комиссиялар белгиленип жатканын кошумчалады.
