Бишкекте 18–21-февраль күндөрү "Агродиалог-2026" форуму өтөт
Суу ресурстары, айыл чарба жана кайра иштетүү өнөр жайы министрлиги 2026-жылдын 18–21-февраль күндөрү "Агродиалог-2026" форумун өткөрөт.
Форумдун алкагында:
- 18-февралда "Өсүмдүк өстүрүү жана багбанчылык боюнча чемпиондор мастер-классы";
- 19-февралда – "Мал чарба тармагы боюнча чемпиондор мастер-классы";
- 20-февралда – "Кайра иштетүү жана экспорт" багытындагы тематикалык сессиялар өтөт.
Иш-чаралар К.И. Скрябин атындагы Кыргыз улуттук агрардык университетинин базасында уюштурулат.
Форумдун негизги максаты – агроөнөр жай тармагындагы алдыңкы тажрыйбаларды жайылтуу, чемпион-фермерлердин ийгиликтүү кейстерин бөлүшүү, кайра иштетүү жана экспорт мүмкүнчүлүктөрүн кеңейтүү, ошондой эле эл аралык эксперттердин катышуусунда тармактагы актуалдуу маселелерди талкуулоо.
21-февралда жыйынтыктоочу салтанат Т. Сатылганов атындагы Кыргыз улуттук филармониясында өтүп, "Агродиалог-2026" чемпиондорун сыйлоо аземи жана концерттик программа менен коштолот.
Иш-чарага мамлекеттик органдардын өкүлдөрү, эл аралык эксперттер, фермерлер, кайра иштетүүчү ишканалар, экспортёрлор, бизнес-ассоциациялар жана ЖМК өкүлдөрү катышат.
