Булуттук электрондук кол тамгасын алуу үчүн жеке жана юридикалык жактарга кандай документтер керек?
Булуттук электрондук кол тамгасын (БЭК) алуу үчүн жеке жана юридикалык жактарга кандай документтер керектигин “Түндүк” мамлекеттик мекемеси билдирди.
Мекеме калкты тейлөө борборуна (КТБ) барып, булуттук электрондук кол тамгасын акысыз алууга болорун айтат. Булуттук электрондук кол тамгасы жеке адамдарга гана эмес, Бирдиктүү идентификациялоо системасына каттала турган юридикалык жактарга да берилет (мисалы, salyk.kg сайтына отчет берүүчүлөргө).
Жеке адамдар КТБга жекече кайрылышы зарыл, ошону менен бирге паспорту жана электрондук почтасы болушу кажет. Юридикалык жактар дагы уюмдун жетекчиси же ишенимдүү адамы аркылуу зарыл болгон документтер менен КТБга кайрылууга тийиш:
- “Инфоком” МИнин Тастыктоо борборунун (ТБ) регламентине кошулуу жөнүндө макулдашуу (Макулдашууну infocom.kg сайтынын “Биздин ТБ” бөлүгүнөн жүктөп алса болот)
- Юридикалык жактардын өкүлдөрү үчүн Тастыктоо борборунун колдонуучусунун ишеним каты (Ишеним катты infocom.kg сайтынын “Биздин ТБ” бөлүгүнөн жүктөп алууга болот)
- Тастыктоо борборунун колдонуучусунун паспорт көчүрмөсү (түп нускасы жанында болушу керек)
- Ыйгарым укуктуу өкүлдү кызматка дайындоо жөнүндө уюмдун буйругунун көчүрмөсү
- Уюм жетекчисин дайындоо жөнүндө буйруктун көчүрмөсү
- Юридикалык жакты мамлекеттик каттоо/кайра каттоо жөнүндө күбөлүктүн көчүрмөсү
- Электрондук почта.
- Калкты тейлөө борборунун операторлору Бирдиктүү идентификациялоо системасынан берилген электрондук почтага сырсөз жөнөтөт.
Белгилей кетсек, Мамлекеттик салык кызматы «Инфоком» мамлекеттик ишканасы менен кызматташтыкта салык төлөөчүлөр үчүн булут электрондук кол тамганы берүү боюнча пилоттук долбоорун ишке киргизген.
