Кореялык инвесторлор Баткенде 30 га аянтка соя эгишти - кийинки жылы 500 гектарга жеткирүүнү пландап жатышат
“Алыш-Дан” био кооперативинин өкүлү Турсунали Төлөмүшов Түштүк Кореялык инвесторлор келип, Баткенге 30 га аянтка соя эгишкенин жана алар келерки жылы аны 500 гектарга чейин жеткирүү пландары бар экенин өзүнүн Фейсбук баракчасында билдирди.
Анын айтымында, жыл башында Түштүк Кореядан инвесторлор келип, “ТулженКыргыз” компаниясын түзүү менен Баткенге соя өсүмдүгүн себип башташкан.
“Облус башчысынын орун басары Тимур Мысыровичтин жетекчилигинде аталган инвесторлор менен жергиликтүү бийлик жетекчилери ортосунда жолугушуу болуп өттү. “ТулженКыргыз” компаниясы быйылкы жылы 30га аянтка соя өсүмдүгүн себишкендигин жана кийинки жылга бул көлөмдү 500 гектарга жеткирүү пландары бар экендигин айтышты.
Мындан сырткары, жүгөрү өсүмдүгүн себүү менен фермерлер үчүн жакшы тоют даярдоо пландары бар экендигине токтолушту. Соя өсүмдүгүнөн жогорку сапаттагы май алууну көздөшүүдө. Баткендин суу чыкпай жаткан жерлерине жер астынан суу чыгарып, айдоо жерлерге жана бакка айлантуу максаттары күч экендигин айтышты. Баткендин кооптуу аймак экендигине карабай, айыл чарбасын өнүктүрүүгө салым кошуп иштеп жаткан “ТулженКыргыз” компаниясынын ишине ийгиликтерди каалайбыз”, – дейт ишкер.
Эскерте кетсек, кыргыз бийлиги чек ара окуяларынан кийин Баткен облусуна 1 млн доллар өлчөмүндө инвестицияларга (КРнын башка аймактарында 3 млн доллардан кем эмес), Баткен облусу үчүн тоо-кен тармагына 10 млн АКШ доллар инвестицияларга (башка аймактарда 20 млн доллардан кем эмес) мамлекеттик кепилдиктер берилерин жана мамлекет инвесторлорго келтирилген зыяндын ордун толтурууга милдеттенерин билдирген.
