МСК жүк ташуучу унааларга навигациялык пломбаларды коюуну 2023-жылга чейин узартты
Салык кызматы импорттолуучу товарларга байкоо жүргүзүү үчүн навигациялык пломбаларды колдонуу боюнча пилоттук долбоорду узартты. Бул тууралуу МСКнын маалымат кызматы кабарлады.
Эске салсак, МСК өткөн жылы башталган КРнын аймагы аркылуу авто унаа менен товарларды ташууда навигациялык пломбаларды колдонууну тестирлөө боюнча пилоттук долбоорду 2022-жылдын 15-февралына чейин узарткан болчу.
Аталган пилоттук долбоор тышкы экономикалык иштердин катышуучуларын ЕАЭБде навигациялык пломбаларды колдонууну киргизүүгө даярдоо максатында ишке ашырылууда жана 2023-жылдын 31-январына чейин иштейт.
Контролдук пломбаларды коюу МСК тарабынан жүргүзүлөт, ал эми навигациялык пломбаларды коюу КРнын Эл аралык автомобилдик ташуучулар ассоциациясы (Товарларды ташууга байкоо жүргүзүү системасынын улуттук оператору) менен биргеликте жүзөгө ашырылат.
Пилоттук долбоордун жүрүшүндө жүктөрдү ташууну жүзөгө ашыруучу тобокелдикке багытталган ишкердик субъектеринин транспорт каражаттарынын жүк жүктөлүүчү жайларында (бөлүктөрүндө) контролдук жана/же навигациялык пломбалар акысыз негизде орнотулат.
Буга чейин пилоттук долбоорго КРнын аймагына алкоголдук жана тамеки продукцияларын ташып келүүчү 6 компания – FORESTER, «Сибирь Трейд», «Глобал Риверс», «Крона Трейд», «Тобако Маркет», «Росс Табак» ЖЧКлары катышкан болчу.
