Жеке маалыматтарды коргоо боюнча мамагенттик айрым банктарга жарандардын жеке маалыматтарынын сыртка чыгуу тобокелдиги боюнча суроо-талап жөнөттү
Жеке маалыматтарды коргоо боюнча мамлекеттик агенттик айрым банктарга жарандардын жеке маалыматтарынын сыртка чыгуу мүмкүндүгү тууралуу суроо-талаптарды жөнөттү. Бул тууралуу агенттиктин маалымат кызматы билдирди.
Интернет-банкинг чөйрөсүндөгү эң ири программалык камсыздоо
провайдери Right Line хакердик чабуулу тууралуу ЖМКларда
тараган маалыматка байланыштуу министрлер кабинетине караштуу Жеке маалыматтарды коргоо боюнча мамлекеттик
агенттик Кыргызстандагы айрым банктарга суроо-талаптарды жөнөттү.
Жарандардын жеке маалыматтарынын ачыкка чыгышынын мүмкүн болуучу тобокелдиктеринен коргоо максатында, Мамлекеттик агенттик бул окуяга байланыштуу банктар тарабынан көрүлгөн чаралар жөнүндө толук маалыматты сурады.
Жеке маалыматтарды коргоо боюнча мамлекеттик агенттик
жарандарды жеке маалыматтары менен колдонууда сак болууга чакырат.
“Банктык реквизиттерди бөлүшпөңүз, онлайн сатып алууда этият болуңуз, шектүү билдирүүлөрдү ачпаңыз, компьютериңизге жана уюлдук телефонуңузга белгисиз тиркемелерди орнотпоңуз”, – деп билдиришти агенттиктен.
Эскерте кетсек, Жеке маалыматтарды коргоо боюнча мамлекеттик агенттик 2022-жылдын 10-январынан тарта иштеп баштаган.
Белгилей кетсек, жакында эле украиналык хакерлер Россиянын жана КМШ өлкөлөрүнүн банктары үчүн программалык камсыздоо боюнча эң ири жеткирүүчү болгон россиялык Right Line компаниясынын маалыматтык коопсуздугуна чабуул жасаганы белгилүү болгон. Бул компания аркылуу россиялык банктардын, ошондой эле Кыргызстандагы эки банкы «Банк Кыргызстан» жана «ФИНКА Банктын» кардарларынын документтерине жана маалымат базасына кирүү мүмкүнчүлүгү алынганы айтылган эле.
