Коррупцияга каршы күрөш: жаңы мыйзам күчүнө кирет
Президент Садыр Жапаров 2026-жылдын 15-январында Жогорку Кеңеш тарабынан кабыл алынган "Коррупцияга каршы аракеттенүү жөнүндө" мыйзамга кол койду.
Мыйзамдын максаты – коррупцияга каршы аракеттерди күчөтүү, мамлекеттик жана жергиликтүү өз алдынча башкаруу органдарында коррупциянын деңгээлин төмөндөтүү, санариптештирүү процесстерин өнүктүрүү, коррупцияга каршы маданиятты калыптандыруу жана билим берүү, маалыматтык-профилактикалык иштерди жакшыртуу.
Ошондой эле, мыйзам Кыргыз Республикасынын Президентинин 2024-жылдын 5-июнундагы № 137 "2025-2030-жылдарга коррупцияга каршы аракеттенүү боюнча мамлекеттик стратегия" Жарлыгын ишке ашырууга багытталган.
Мыйзам төмөнкү багыттарды камтыйт:
- Коррупцияга каршы аракеттенүүнүн максаттары, милдеттери жана терминдерин так аныктоо;
- Коррупцияга каршы аракеттенүү субъекттеринин чөйрөсү жана милдеттери, мамлекеттик жана муниципалдык органдардын жоопкерчилиги;
- Коррупциянын алдын алуу, ага каршы күрөшүү жана мыйзамда каралган жоопкерчиликти жүзөгө ашыруу;
- Коррупцияга байланыштуу кылмыштардын бирдиктүү реестрин жүргүзүү жана кызыкчылыктардын кагылышуусун башкаруу боюнча механизмдерди камсыздоо.
Мыйзам расмий жарыяланган күндөн тартып он күн өткөндөн кийин күчүнө кирет.
