Бийлик эмнеге КРнын «Центеррадагы» 656 млн долларлык акциясын алып калганга аракет кылбады? - Бириккен демократиялык кыймылы
КРдагы оппозициячыл “Бириккен демократиялык кыймылы” 27-августта президент Садыр Жапаровдун “Кабар” мамлекеттик маалымат агенттигине берген маеги боюнча билдирүү жасашты.
Аталган кыймыл Садыр Жапаров айткан “Центеррадагы” 26% үлүш, (баасы 500-600 млн доллар) жөн эле кагаз болуп калганы, “30 жылда 30 тыйын дивиденд бербеген акциянын эмне кереги бар” деген билдирүүсүнө токтолду.
“Ошол эле учурда 2021-жылдын жыйынтыгы боюнча ошол акциялардан түшкөн 11 млн доллар дивиденддерди төлөттүк деп өзү билдирди. Эгерде жылына ушундай өлчөмдө дивиденд алып турсак, анда 30 жылда ал киреше канча болгонун эсептеп алгыла. Жөн эле кагаз болсо, эмнеге “Кыргыз Алтындын” жетекчиси Кыргызстандын үлүшүн бербейли деп аракет жасады? “Центерранын” акциялары жөн эле кагазга айланып ит бекер кетип калбашы үчүн, бийлик эмне аракет жасады?
Торонто биржасынын маалыматы боюнча, 2022-жылдын январ айында Кыргызстандын 26% акциясынын баасы 656 млн 366 миң доллар болчу. Эмнеге 656 млн доллар турган акцияларды сатып же Кыргызстанга калтырганга аракет жасаган жок? Ар кайсы өлкөлөрдөн бюджетти колдоо үчүн тилемчилик кылып жүргөн өкмөтүбүзгө, кантип 656 млн доллар “жөн эле кагаз” болуп калган? – деп айтылат билдирүүдө.
Эскерте кетсек, президент жогоуда аталган агенттикке берген маегинде: “Акциябыздан эмнеге баш тарттык, 500-600 миллиондук акциябыз бар болчу” дешет. “30 жылда 30 тыйын дивиденд пайда албаган акциянын эмне кереги бар?” демекчимин. Биз “Кумтөрдү” алып кеткенден кийин андан да ылдый түшүп калды. Ал акцияларыбыз жөн эле бир кагаз болуп калган”, – деген болчу.
