Энергетиктика тармагында 210 кызматкер жумуштан бошотулду - жылына 105.5 млн сомдон ашык каражат үнөмдөлөт
Кыргызстанда энергетика тармагын башкарууну реструктуризациялоо аяктады. Бүгүн, 6-сентябрда Энергетика министрлигинде реструктуризациянын жана жүргүзүлгөн реформалардын жыйынтыгы чыгарылды.
Ишканаларды кайрадан түзүү жана таандык кылуу жөнүндө чечимдер кабыл алынды. “Түндүк электр”, “Чыгыш электр”, “Ошэлектро” жана “Жалалабатэлектро” энергетикалык ишканалары “Кыргызстандын улуттук электр тармагы” ААКга, ал эми “Бишкекжылуулуктармагы” ААК “Электр станциялары” ААКсына бириктирилди. Бул 1 млрд сомду үнөмдөөгө жардам берип, бул каражат энергетикалык кубаттуулуктарды көбөйтүүгө жумшалмакчы.
Компаниянын кызматкерлеринин санын кыскартуу чечимине ылайык, жетекчиликтеги 60 штаттык жумушчу кызматтан кетти. Анын ичинде 25 директорлор кеңешинин мүчөсү, 15 башкы директор, 15 текшерүү комиссиясынын мүчөсү жана 5 катчы бар. Бул жылына 22 млн сом үнөмдөөгө жардам берди.
Башкаруу аппаратында бири-бирин кайталаган жетекчилерди жана ишканалардын бөлүмдөрүн жоюу 150 штаттык бирдикти кыскартып, бул 83.5 млн сомду үнөмдөөгө жардам берди.
