Германиялык туристтерге Кыргызстанга поезд менен тур уюштурулду
Кыргызстанга Германиядан туристтер туристтик поезд менен келишти. Бул тууралуу “Кыргыз темир жолунун” маалымат кызматы билдирди.
Маалыматка таянсак, 2022-жылдын август айында германиялык Lernidee Erlebnisreisеn GmbH туристтик компаниянын өкүлдөрү Германиядан келе турган коноктор үчүн Кыргызстандын ичиндеги темир жол аркылуу туристтик турга көмөк көрсөтүү өтүнүчү менен “Кыргыз темир жолу” УК МИге кайрылышкан.
“Кыргыз темир жолу” ишканасы өлкөнүн туристтик потенциалын өнүктүрүүнүн алкагында бул демилгени колдоп, аталган турга ар тараптуу көмөк көрсөтүп, туристтик поезддин өлкө ичинде темир жол менен жүрүү шартын, коопсуздугун камсыздады. Алгач коноктор Германиядан учак менен Алматы шаарына 4-сентябрда келишкен. Андан соң 5-сентябрда тур үчүн жаңы түзүлгөн поезд менен Кыргызстанга келишкен.
Иш-чаранын жүрүшүндө туристтер Боом капчыгайынын көркүнө күбө болуп, Чынгыз Айтматов атындагы «Рух Ордо» маданий борборунда болушуп, Ысык-Көлдү кыдырып чыгышты. Бүгүн, 6-сентябрда туристтик поезд Бишкек шаарына кайтып келди. Коноктор туркомпания уюштурган программанын калган бөлүгүн көрүшөт жана алар Кыргызстандан кийин Өзбекстанга барышып, андан соң Германияга кайтышат”, – деп айтылат маалыматта.
Туристтердин келишинин максаты – өлкөнүн кооз жерлерин кыдыруу, кыргыз элинин тарыхий жана маданий мурастары менен таанышуу болгон.
