Бишкектин тургуну 6 жыл чогулткан KUNAN TAITORU спорттук унаасын презентациялады - фото
Кечээ, 7-сентябрда Бишкек шаарындагы Zaman ресторанында биринчи кыргызстандык Kunan MR 300 sport (KUNAN TAITORU) спорт унаасынын презентациясы болду.
Бул унааны жасоо идеясы Медер Койлубаевге таандык жана аталган спорттук унааны колу менен чогултууга 8 адам 6 жыл жумшаган.
Койлубаевдин айтымында, унааны чогултууда гибриддик материалдар, түрдүү тетиктер колдонулган жана 300 аттын кубатын берген Subaru Legacy автоунаасынын кыймылдаткычы коюлган. Ал эми кузовун чогултууда карбон жана плексигласс колдонулган.
«Бул амбициялуу долбоор. Бул ишке ашкан кыял. Спорттук унаанын аталышындагы «Кунан» үч жылдык жаш айгырды билдирет. Ал эми “Тайтору” – “Манас” эпосундагы күлүк аттын аты ушундай болгон», – деген Койлубаев унааны сатуу ниети жок экенин билдирди.
Машина азырынча «Унаа» мамлекеттик ишканасында каттала элек, анткени буга чейин эч ким үйдөн жасалган унааларды каттаган эмес.
