«Кыргыз почтасы» Германиянын логистикалык компаниялары менен кызматташуу боюнча сүйлөшүп жатат
Өткөн жумада «Кыргыз почтасы» ААКсынын жетекчилиги Германиянын M&M (Militzer&Munch) жана EMEX ЖЧШ (кат жана жүктөрдү тез жеткирүү кызматы) логистикалык компаниялары менен жолукту. Бул тууралуу ишкананын басма сөз кызматы билдирди.
Жолугушууда Кыргызстандын логистикалык жана трансчек аралык потенциалы тууралуу сөз болду. Сүйлөшүүнүн жүрүшүндө M&M компаниясынын жетекчиси Николас Колер «Кыргыз почтасы» менен логистика жана электрондук коммерция тармагында кызматташуу анын компаниясы үчүн бир катар артыкчылыктарды алып келерин белгиледи.
Militzer&Munch – 130 жыл мурун Германияда түзүлгөн эл аралык транспорттук жана логистикалык компания. Компания азыр Батыш жана Чыгыш Европада, КМШда, Араб Магриб союзуна мүчө өлкөлөрдө, ошондой эле Жакын, Орто жана Ыраакы Чыгыш өлкөлөрүндө өз кызматтарын сунуштайт. 2018-жылы компаниянын жүгүртүүсү 512 млн еврону түзгөн.
EMEX уюму болсо эл аралык Militzer&Munch концернине кирет. Башкы кеңсеси Швейцарияда, филиалдары дүйнө жүзү боюнча жайгашкан. Компаниянын Россияда гана жүгүртүүсү жылына 20 млрд рублдан ашат.
