Кепилдик фонду жаңы портфелдик кепилдиктерди сунуштады
Бүгүн, 13-сентябрда Бишкекте “Портфелдик кепилдиктер – жаңы кепилдик продуктусу Мамлекеттик турак жай программаларын ишке ашырууга «Кепилдик фонд» ААКнын катышуусу” деген темада тегерек стол болуп өттү.
Тегерек столдун негизги темасы – “КРдагы кепилдик фонддор жөнүндө” мыйзамындагы өзгөртүүлөрдүн негизинде Кыргызстандын рыногунда жаңы кепилдик продуктунун пайда болушу – портфелдик кепилдиктер, ошондой эле мамлекеттик ипотекалык кредиттөө программаларынын катышуучуларына «Кепилдик фонд» ААК тарабынан кепилдиктерди берүү механизмин талкуулоо болду.
Эске салсак, мыйзамга киргизилген өзгөртүүлөргө ылайык, МИКтен насыя алып жаткан жарандар «Кепилдик фонд» ААК кепилдиктерине ишене алышат жана кепилдик берүүчү катары банктарга сунуштай алышат.
Банктар жарандарга ипотекалык насыяларды, эгерде аларда бүгүнкү күндө ипотекалык турак жайдын баасынан 10%дан 20%га чейинки өлчөмүндөгү баштапкы төлөм боюнча кыйынчылыктар жаралса, кепилдик фондунун кепилдиги менен беришет.
“Кепилдик фонду” ААКнын төрагасынын орун басары Эрик Таласбаев тегерек столдо жаңы кепилдик продукт – портфелдик кепилдиктердин бет ачарын өткөрдү.
Анын айтымында, портфелдик кепилдиктерди каттоо системасы үч принципке негизделет:
- Автоматтык каттоо принциби – ФКУнун критерийлерине жооп берген бардык берилген кредиттерди каттайт. Жеке кредиттерди тизмеден чыгарууга тараптардын укугу жок.
- Пропорционалдуулук принциби – кредиттин бүткүл мөөнөтүнүн ичинде катышуунун белгиленген үлүшүнө ылайык, ФКУ менен “Кепилдик фонддун” жоопкерчилигин бөлүштүрүү болуп саналат.
- Анонимдүүлүк принциби – карыз алуучуга ал алган кредиттин кошумча камсыздоосу жөнүндө маалымат берилбейт, бул алуучунун карызды төлөө потенциалын жогорулатат.
Белгилей кетсек, тегерек столго президенттин администрациясынын, министрлер кабинетинин, Жогорку Кеңешинин депутаттарынын, КРнын Улуттук банкынын, «Мамлекеттик ипотекалык компания» ААКсынын өкүлдөрү, ошондой эле «Кепилдик фонд» ААКнын өнөктөш банктардын жетекчилери катышышты.
