Сауд Арабиянын Инвестиция министрлигинен жумушчу топ Кыргызстанга иш сапары менен келет
Сауд Арабия Падышачылыгы Кыргызстандын экономикасына инвестиция салууга даяр. Бул тууралуу КРнын Сауд Арабиядагы элчиси Улукбек Марипов билдирди.
Анын айтымында, жакынкы арада аталган өлкөнүн Инвестиция министрлигинен жумушчу топ Кыргызстанга иш сапары менен келет. Алар КРга келүү менен анын инвестициялык потенциалы, улуттук ири долбоорлор жана эки тараптын кызыкчылыгына төп келген дагы башка багыттары менен жакындан таанышып чыкмакчы.
“Аталган жумушчу топтун иш сапары боюнча биз Сауд Арабия Падышалыгынын Инвестиция министринин орун басары Бадр бин Ибрахим Аль-Бадр менен болгон жолугушууда макулдаштык. Андан сырткары, биз жолугушууда алдыда боло турган кыргыз-сауд бизнес форуму жөнүндө жана эки тараптуу ишкерлик кеңешин түзүү тууралуу сүйлөштүк.
Эки өлкөнүн энергетика, айыл чарба, логистика, туризм жана башка көптөгөн тармактар боюнча кызматташууну өнүктүрүү үчүн потенциалдары абдан чоң. Биргелешкен долбоорлордун бир бөлүгү ишке ашырылып жатат. Ошондой эле бул арада Сауд Арабия тарап өзүн ишенимдүү өнөктөш жана инвестор катары көрсөтө алды”, – деди Марипов.
Эскерте кетсек, буга чейин Сауд Арабиянын Инвестиция министри Камбар-Ата-1 ГЭСинин техникалык-экономикалык негиздемесин иштеп чыгууга жана курулушуна катышууга даяр экенин билдирген болчу.
Кошумча окуңуз:
Сауд Арабия Камбар-Ата-1 ГЭСин кошо курууга даяр
Сауд өнүктүрүү фондунун жеңилдетилген насыясына Бишкекте балдар үчүн тез жардам ооруканасы курулат
Сауд өнүктүрүү фонду КРда мындан ары да социалдык долбоорлорду ишке ашыруу ниетин билдирди
Сауд өнүктүрүү фонду Кыргызстандын 87 миң долларлык карызын төлөөнү 2027-жылга чейин узартат
Сауд өнүктүрүү фондунун акчасына Кыргызстанда төрт мектептин курулушу аяктады.
