Кыргызстанда 2023-жылы жогорку сапаттагы «Евро-5» бензинин чыгаруучу завод курулат
Кыргызстанда 2023-жылы “Евро-5” үлгүсүндөгү сапаттуу бензин чыгаруучу завод курулат. Бул тууралуу кечээ, 24-ноябрда, Жогорку Кеңештин жыйынында министрлер кабинетинин башчысы Акылбек Жапаров билдирди.
Талкууда депутат Ырысбек Атажанов Кадамжай районундагы Бүргөндү газ сактагычтагы жаткан мунай толугу менен Кыргызстанга өткөндүктөн, алар менен качан иш башталарын сурады.
«Биз «Кыргызнефтегаз» ААК мамлекеттик ишканасын түздүк, сактагыч анын балансына өткөрүлүп берилди. Биз Өзбекстандан бизге техникалык паспорт берүүсүн суранабыз, ошолор менен бирге иштеп чыгабыз. Бул маселе боюнча биздин энергетика министрибиз иштеп жатат», – деди Жапаров.
Минкаб башчысы ошондой эле азыркы учурда «Кыргызнефтегаз» ишканасы модернизацияланып, арабдар менен биргеликте бизнес-план бүткөрүлүп жатканын белгиледи.
«Кийинки жылы “Евро-5” үлгүсүндөгү 500 миң тонна бензин чыгара турган газ заводун куралы деп жатабыз», – деди ал.
Эске салсак, Economist.kg басылмасы “Бишкек дагы түтүн каптаган кышка даярбы?” деген темада тегерек стол өткөргөн. «Жашыл энергия» коомдук фондунун жетекчиси Анара Султангазиева автотранспорттор шаарды булгаган негизги факторлордун бири экенин айткан.
“Биз ЕАЭБдин ичинде азыркыга чейин сапатсыз К2, К3 бензиндерин колдонуп жана өндүрүп келе жаткан жападан жалгыз өлкөбүз. Ал белгилегендей, Европада болсо эчак эле “Евро-7″ бензинин колдонушат”, – деген ал.
