Башкы прокуратура бир жылда бизнес укуктары боюнча 577 мыйзам бузуу аныктап, 2 кылмыш ишин козгогон
Башкы прокурор Максат Асаналиев 2026-жылдын 8-апрелинде Жогорку Кеңештин пленардык жыйынында 2025-жылга карата ишкерлердин укуктарын коргоо боюнча жүргүзүлгөн иштердин жыйынтыгын билдирди.
Анын айтымында, отчеттук мезгилде прокуратура органдары бизнес укуктарын сактоо боюнча 233 текшерүү жүргүзгөн. Натыйжада 577 мыйзам бузуу аныкталган. Аларды жоюу үчүн 347 прокурордук чара көрүү актылары киргизилген. Жыйынтыгында 136 кызмат адамы дисциплинардык жоопкерчиликке, 111и айып пулга тартылып, 2 кылмыш иши козголгон.
2025-жылы прокуратурага, укук коргоо жана салык органдарына ишкерлерди текшерүүлөрдү каттоо боюнча 5643 кайрылуу түшкөн. Алардын ичинен 5070 текшерүү катталган, ал эми 587 учурда (анын ичинде: 453 — Салык кызматынан, 55 — УКМКдан, 78 — ИИМден, 1 — прокуратурадан) мыйзам талаптарына жооп бербегендиктен каттоодон баш тартылган.
Ошондой эле 2025-жылы ишкерлерден прокуратура органдарына 482 кайрылуу түшкөн. Алардын ичинен:
- 167си (34,6%) канааттандырылган;
- 26сы канааттандыруудан баш тартылган;
- 231ине түшүндүрмө берилген;
- 58 кайрылуу каралып жатат.
