Бишкекте 400гө жакын лифттин кызмат мөөнөтү эбак өтүп кеткен – Р.Алиев
Бишкек шаардык кеңешинин турак жай-коммуналдык чарба, отун-энергетикалык комплекс, транспорт, коммуникациялар жана экология боюнча туруктуу комиссиясы 8-апрелде Аламедин-1 кичи районундагы кооперативдердин өкүлдөрүнүн кайрылуусун карады. Кайрылуу көп кабаттуу үйлөрдөгү лифт жабдууларынын абдан эскиришине байланыштуу болгон.
10 үйдүн кызыкчылыгын коргогон Татьяна Горкинанын айтымында, 1979-жылы пайдаланууга берилген үйлөрдөгү лифттер 25 жылдык нормативдик мөөнөтүнө карабастан, 45 жылдан ашык убакыттан бери колдонулуп келет.
Жыл сайын тургундардан болжол менен 800 миң сом чогултулат, анын ичинен 500 миң сомго жакыны жеке компания тарабынан лифттерди тейлөөгө кетет. Мындай шартта жаңы жабдууга акча топтоо мүмкүн эмес: жылына 300 миң сомдон бөлүнсө да, керектүү сумма ондогон жылдарда гана чогулат. Мындан тышкары, тургундардын 44%ы пенсионерлер болгондуктан, тарифтерди жогорулатуу да кыйын.
Вице-мэр Рамис Алиев "Бишкекгшаарлифт" ишканасында бир катар көйгөйлөр бар экенин ырастады.
Учурда ишкананын тейлөөсүндө болжол менен 900 лифт бар. Анын жарымы муниципалдык, калган бөлүгү башка (жеке же ТСЖ) лифттер. Лифттин кызмат мөөнөтү — 25 жыл.
"Бүгүнкү күндө Бишкек шаарында 400гө жакын лифттин кызмат мөөнөтү өтүп кеткен. Алардын арасында 47 жыл иштегендери да бар. Мэрия жыл сайын лифттерди алмаштыруу планына 100гө жакын лифтти киргизет. Бул жылы 93 лифт каралган. Биз бекитилген план боюнча иштеп жатабыз.
Азыр “башка” лифттер маселеси курчуп турат. Ушундай темп менен жүрсөк, 3–4 жылда муниципалдык лифттер боюнча маселе чечилет, бирок башкалары боюнча көйгөй кала берет. Ошондуктан Бишкек шаардык кеңешинин токтомуна ылайык, “башка лифттер” категориясындагы үйлөр “Бишкекшаарлифтке” кайрылып, аларды муниципалдык лифттер категориясына өткөрүп, алмаштыруу тизмесине киргизсе болот",-дейт вице-мэр.
