Баткенде 20 млн сомго табигый таштан жол жана тротуар курулат
Баткен районундагы Кара-Бак айыл аймагынын Дөбө айылында табигый таштан жол жана тротуарлар курулат. Долбоордун баасы 19.5 млн сомду түзөт. Бул тууралуу Транспорт министрлигинин маалымат кызматы билдирди.
Бул долбоордун тапшырыкчысы КРнын Транспорт жана коммуникациялар министрлигине караштуу «Кыргызавтожол» мамлекеттик ишканасынын №2 жол тейлөө ишканасы, подрядчы «Жалалабат АБЗ» ААКсы (асфальт-бетон заводу) саналат.
Долбоордун сметалык баасы – 19.5 млн сом жана ал 3 км жолго жана эки көчөнүн тротуарына бөлүнөт.
Учурда Дөбө айылында табигый ташты кесүүчү завод берилген өлчөмдөргө ылайык ишке киргизилип, жолдун 1 чакырым тилкесиндеги табигый таш төшөө үчүн фундаменти даярдалды.
Эгерде жолдун таш төшөлмөсүн куруу боюнча пилоттук долбоор оң натыйжа берсе, жолдун бир бөлүгүн табигый таш менен төшөө ыкмасы улуттук долбоор катары каралып, өлкө боюнча киргизилет.
