Кыргызстан экологияны жакшыртууга Дүйнөлүк банктан 50 млн доллар кредит алат
Финансы министрлиги Кыргызстан экологиялык көйгөйлөрдү чечүү максатында Дүйнөлүк банктан 50 млн доллар сурап жатканын билдирди.
Министрликтин берген маалыматына таянсак, КРдагы абанын сапатын жакшыртуу жана Бишкек шаарындагы турак жайларды жылытуу, ошондой эле жашылдандыруу максатында, экологиялык таза чечимдерди илгерилетүү боюнча потенциалын чыңдоо үчүн учурда Дүйнөлүк Банк менен Сапатты жакшыртуу долбооруна 50 млн доллар өлчөмүндө кредит алуу боюнча сүйлөшүүлөр жүрүп жатат.
Ошондой эле министрлик 2022-жылга КР Жаратылыш ресурстары экология жана техникалык көзөмөл министрлигине бюджеттик каражаттарды кошкондо 856.3 млн сом өлчөмүндө каражат каралганын кошумчалады. Анын ичинен:
- бюджеттик каражаттар – 628.5 млн сом
- атайын эсептеги каражаттар – 227.8 млн сом.
“Бюджеттик каражаттын 628.5 млн сомунун бүгүнкү күндө 72%ы бөлүнгөн, калганы ушул жылдын декабрь айынын аягына чейин каржыланат. Ошондой эле Жаратылышты өнүктүрүү фондуна 3.7 млн доллар (301.3 млн сом) өлчөмүндө каражат каралган. Муну менен катар 2022-жылга жана өткөн жылдардагы өздөштүрүлбөгөн каражаттардын калдыктары бар”, – дейт Финансы министрлиги.
