Кытай - Кыргызстан - Өзбекстан темир жолу боюнча ТЭН 2023-жылдын 1-июнуна чейин бүтүш керек
Техникалык экономикалык негиздеме (ТЭН) боюнча бардык жумуштар, анын ичинде аны баалоо 2023-жылдын 1-июнуна чейин бүтүшү керек. Бул тууралуу Экономика министрлигинин маалымат кызматы билдирди.
Бул каттам Кытайдан Кыргызстанга, ошондой эле Борбор Азия жана Жакынкы Чыгыш өлкөлөрүнө, анын ичинде Түркияга жана андан ары Европа Биримдигине товарларды жеткирүүнү камсыздай алат.
Долбоор жүктөрдү жеткирүүнүн аралыгын жана убактысын (700 км жана ташуу убактысы 10 күнгө чейин) кыскартуу аркылуу транзиттик ташуулардын эл аралык рыногунда атаандаштыкка жөндөмдүүлүктү жогорулатат. 1000ден ашык адам иш менен камсыз кылынат.
Ошондой эле 2022-жылдын июнь-июль айларындагы сүйлөшүүлөрдүн жүрүшүндө тараптар Кытай-Кыргызстан-Өзбекстан темир жолунун КРнын аймагы аркылуу өтүүчү бөлүгүн куруунун техникалык-экономикалык негиздемесин иштеп чыгууну макулдашышканы белгиленген.
Эскерте кетсек, 2022-жылдын 14-сентябрында Өзбекстандын Самарканд шаарында Шанхай Кызматташтык Уюмунун Саммитинин алкагында Кытай-Кыргызстан-Өзбекстан темир жолун куруу долбоору (Кыргызстандын аймагындагы участок) боюнча кызматташуу боюнча Кытай Эл Республикасынын өнүктүрүү жана реформа боюнча мамлекеттик комитети, КРнын Транспорт жана коммуникациялар министрлиги менен ӨРнын Транспорт министрлигинин ортосунда меморандумга кол коюлган.
Документте КРнын аймагындагы Торугарт – Арпа – Макмал – Жалал-Абад каттамынын бириктирилген варианты боюнча Кытай-Кыргызстан-Өзбекстан темир жолун куруу долбоорунун техникалык-экономикалык негиздемесин ийгиликтүү бүтүрүүгө биргелешип көмөк көрсөтүү каралган.
Тараптар Кыргызстанда ТЭН жүргүзүүдө Кытай темир жол корпорациясынын Биринчи долбоорлоо-изилдөө институтуна активдүү кызматташып, биргелешип колдоо көрсөтүшөт. ТЭН боюнча бардык иштерди аяктоо мөөнөтү (баалоо убактысын кошкондо) 2023-жылдын 1-июнунан кеч эмес болушу керек.
