Минкабдын алдындагы Архитектура агенттиги жасалма келишим түзүп, бюджеттен 15 млн сомду чыгарып кеткен
Минкабга караштуу Архитектура, курулуш жана турак жай-коммуналдык чарба мамлекеттик агенттигинин Турак жай-курулуш департаменти жана Чүй облусу боюнча Капиталдык курулуш башкармалыгынын кызмат адамдары жасалма келишимдерди түзүп, республикалык бюджеттен мыйзамсыз 15 млн сом акча каражатын чыгарып кетишкен.
УКМКнын маалымат кызматынын билдиргенине караганда, аталган департамент 2019-жылдын декабрь айында Чүй облусунун аймагындагы орто мектепти курууда тендердик сметага кирбеген жасалма кошумча келишимдерди түзүү жолу менен, республикалык бюджеттен мыйзамсыз 15 млн сом акча каражатты “С.Т.” ЖЧК подрядчы уюмунун пайдасына чыгарып, бирок, иш жүзүндө бул кошумча иштер алар тарабынан аткарылбаганы аныкталган.
Топтолгон материалдардын негизинде тергелип жаткан сотко чейинки өндүрүштүн алкагында, Турак жай-курулуш департаментинин мурдагы директору А.А., Чүй облусу боюнча Капиталдык курулуш башкармалыгынын мурдагы башчысы А.Э., Турак жай-курулуш департаментинин башкы инженери Д.К. жана подряддык ишкананын директору К.А. кармалып УКМКнын тергөө камак жайына киргизилди.
