Кыргызстанда чакан ГЭСтерди курууга ниеттенген 137 компания бар
Кыргызстанда чакан ГЭСтерди курууга ниеттенген 137 компания бар. Бул тууралуу министрлер кабинетинин төрагасынын орун басары Бакыт Төрөбаев билдирди.
Такталгандай, минкаб өлкөдө чакан ГЭСтерди, күн менен шамалдан электр кубатын иштеп чыгуучу станцияларды курууга ниеттенген компаниялардын жетекчилери, ошондой эле бул багытта иш жүргүзгөн тиешелүү мамлекеттик мекемелердин өкүлдөрү менен жыйынын өткөрдү.
Төрөбаев өлкөдө чакан гидроэлектр станцияларынын, күн жана шамал электр станцияларынын курулушу менен туруктуу энергетиканы өнүктүрүүгө болоорун билдирди.
«Албетте, ири ГЭСтерди куруу жана ишке берүү бир нече жылды талап кылат. Ошол себептүү, чакан ГЭСтерди өнүктүрүүнү активдештирип, энергиянын альтернативдүү булактарын өнүктүрүүгө өзгөчө көңүл бурулуп жатат. Айта кетүүчү жагдай, жакшы жерлерге чакан ГЭС, электр станцияларын курат элек деп, ал жерлерди жок кылып албашыбыз керек. Бул багытта жерлерди трансформациялоо иштери дыкат жүргүзүлүп, конкурстар таза өтүүсү зарыл», – деди минкаб төрагасынын орун басары.
