Товарды издөө үчүн көп убакыт кетет - ишкерлер ЭТТК менен иштөөгө нааразы
Электрондук товардык-транспорттук коштомолор ишке кириши менен бизнес процесстери бир аз жайлады. Буга нааразычылыгын Economist уюштурган «ЭТТК деген эмне жана бул система боюнча ишти кантип баштоо керек? Салык кызматынын жооптору» деп аталган жолугушууда ишкерлер билдирди.
Алар товарларды жөнөтүү үчүн жеке кабинетиндеги бардык маалыматтарды толтуруу керек экенин, бирок тизмеден каалаган товардын атын таба алышпай турганын белгилешет. Кызматкерлер буга көп убактысын жумшашат.
«Биз бир күн бою филиалдар бизге бардык маалыматтарды жөнөтүшүн күтөбүз, анткени кызматкерлер тизмеден керектүү товарды дароо таба алышпайт. Кол менен издөөгө туура келип, убакытты текке кетирип жатабыз, унаалар турат, кардарлар күтүп жатышат», – дешет ишкерлер.
Салык кызматынын өкүлдөрү декларацияларды массалык түрдө тапшыруудан улам системада мүчүлүштүктөр болушу мүмкүн экенин айтышты. Ал эми декларациялоо мөөнөтү аяктагандан кийин система кадимкидей иштей баштайт.
Бирок ишкерлер система январь айынан бери жам иштеп жатканын жана бул декларация тапшырууга байланышы жок экенин белгилешти.
