Өлкөдөн сырткары жүргөн мигранттар өз мекенинде пенсиясын топтой алышат
Чет өлкөдө жүргөн мекендештер азыр келечеги үчүн расмий жана эч кандай көйгөйсүз кам көрө алышат. Алар үчүн өлкөдөн сырткары жүрүп деле ыктыярдуу камсыздандыруу төгүмдөрүн аралыктан төлөөнүн ыңгайлуу санариптик механизмдери ишке киргизилген. Бул тууралуу Социалдык фонддон кабарлашты.
Билдирүүгө караганда, мигранттар үчүн жаңы өзгөрүүлөр кийинки шарттарда ишке ашырылат:
• Аралыктан каттоо: “ТҮНДҮК” мобилдик тиркемеси аркылуу Face-ID биометрикалык идентификациясы көмөгүндө же Мамлекеттик салык кызматынын Салык төлөөчүнүн жеке кабинети аркылуу түздөн-түз катталуу.
• Ыңгайлуу төлөм: Ыктыярдуу камсыздандыруу төгүмдөрүн интернет-эквайринг аркылуу Visa, MasterCard же “Элкарт” банктык карталары менен онлайн төлөө.
• Бирдей тарифтер: Төгүмдүн өлчөмүн жаран өзү аныктайт (орточо эмгек акынын 8-10 %дан кем эмес).
Топтолгон каражаттар кантип бөлүштүрүлөт:
• Пенсиялык фондго (ПФ) — 8%
• Мамлекеттик топтомо пенсиялык фондуна (МТПФ) — 2%
Ушуга байланыштуу Соцфонд, жарандарды үйдөн алыста жүрсө да, ишенимдүү келечек үчүн - социалдык кепилдиктерди камсыздоону сунуштайт.
