Кыргызстан менен Жаңы Зеландия халал индустриясын өнүктүрүүгө кызыкдар
КР Экономика жана коммерция министрлигинин аянтында Жаңы Зеландиянын КРдагы элчиси Сара Мэри Уолш менен «Халал индустриясын өнүктүрүү борбору» мамлекеттик мекемесинин директору Алмаз Кайырбековдун жолугушуусу болуп өттү. Бул тууралуу министрликтин маалымат кызматы билдирди.
Жолугушуунун жүрүшүндө тараптар эки тараптуу кызматташтыктын болгон потенциалын аныктоо жана ишке ашыруу, атап айтканда, тажрыйба алмашуу аркылуу халал индустриясы тармагында ишкердик байланыштарды түзүү боюнча күч-аракет жумшоого даяр экендиктерин билдиришти.
Маектешкендер адал этти кайра иштетүү тармагынын кирешелүүлүгүн жана туруктуулугун жогорулатуу максатында илимий-изилдөө иштерине инвестиция салуу маселелерине токтолушту.
Белгилей кетсек, адал эт Жаңы Зеландиянын экспорттогон продукцияларынын тизмесинде негизги орундардын бирин ээлейт. Бүгүнкү күндө исламдын нормаларына туура келген бардык эттер дүйнөнүн 108ден ашуун өлкөсүнө экспорттолот.
