Эмгек министрлиги - 100 жылдык мааракесин белгилей баштады
КРнын Эмгек, социалдык камсыздоо жана миграция министрлиги быйыл өзүнүн 100 жылдык мааракесин белгилеп жатат. Ага ылайык, аталган ведомствонун кызматкерлеринин алгачкы ишчарасы старт алып, спорттук спартакиада болуп өттү.
Ишчаранын ачылышында министр Канат Сагынбаев сөз сүйлөп, 1924-жылы Кара-Кыргыз автономиялуу облусу түзүлгөндөн кийин эле Революциялык комитет тарабынан Эмгек бөлүмү, ал эми 1925-жылы 6-февралда облустук Социалдык камсыздоо бөлүмү түзүлгөндүгүн билдирди.
Маалыматка ылайык, 100 жыл мурда министрликтин башында болгону 58 кызматкер иштесе, бүгүнкү күндө бул 77 аймактык жана ведомстволук бөлүмдөрдү камтыган 5000ден ашык адам иштеген бирдиктүү системага айланды.
Спартакиаданын катышуучуларына эмгек сиңирген спорт чебери, Олимпиада чемпиону Каныбек Осмоналиев жана мурдагы эмгек министри Айгүл Рыскулова да катышып, куттуктоо сөздөрүн айтышты. Эки күнгө уланган спорттук мелдеште жеңил атлетика, волейбол, мини-футбол, шахмат жана аркан тартыш боюнча ат салышуу каралган.
