Баткендик жарандан 111 миң алимент өндүрүлдү
Акыйкатчынын кийлигишүүсүнөн кийин төрт балалуу келинге алимент өндүрүлүп берилгенин Акыйкатчы институтунан билдиришти.
Январь айында акыйкатчы Жамиля Жаманбаевага Баткен облусунун 34 жаштагы тургуну алимент өндүрүүгө жардам сурап кайрылган. Анда ал жолдошу менен үч жыл мурда ажырашканда Кадамжай райондук соту алимент төлөөгө милдеттендиргенин айткан. Алимент ай сайын ар бир балага 3 148 сомдон, төрт балага жалпы 12 594 сом деп эсептелинген.
Арыз ээсинин айтымында, мурдагы жолдошу 2024-жылга чейин алиментти өз убагында төлөп турган, андан кийин жарым-жартылай которуп, 2025-жылы бир да жолу жөнөткөн эмес.
Акыйкатчынын Баткен облусундагы өкүлчүлүгү Кадамжай райондук сот аткаруучулар кызматына суроо-талап жөнөткөн. Текшерүүнүн жүрүшүндө, аялдын мурдагы жолдошу Россияда эмгектенип жүрүп, 2024-жылга карата каражат которгону аныкталган. Бирок техникалык мүчүлүштүктөрдөн улам, тактап айтканда, аялдын банктык эсеби бөгөттөлүп калгандыктан, акча каражаты ага жетпей калган.
Натыйжада 2025-жылга карата алименттик төлөмү 151 миң 128 сомду түзгөн.
Институттун кызматкерлеринин көмөгү менен эми алиментти толугу менен 15-мартка чейин төлөө милдеттендирилди. Февраль айында карызкор мурдагы аялына 111 миң сом которгон.
