Каджы-Сайда аймактын келечеги менен экотуризм талкууланды
Каджы-Сай айылында “Түштүк Ысык-Көлдүн ЭкоРенессансы” демилгесинин алкагындагы алгачкы жыйын болуп өттү. Туризм департаменти, Маданият, маалымат, спорт жана жаштар саясаты министрлиги, “Ысык-Көлдүн түштүгүнүн” дестинациясы, туристтик агенттиктер, саякатчы блогер жана лайфстайл-инфлюенсерден турган өкүлдөр аймакты өнүктүрүү боюнча көз караштары менен бөлүшүштү.
КР Туризм департаментинин өкүлү Малика Молтоева «Туризм синергиясы: демилге, элдер жана илгерилетүү» аттуу баяндамасы менен чыгып, ведомствонун учурдагы демилгелерин жана бардык тармактын катышуучуларынын күч-аракетин бириктирүү зарылдыгын белгиледи.
Бизнес коомчулугунун атынан Nomad Camp жетекчиси Байкал Малдыбаев сөз сүйлөдү. Ал мейманкананын аянтын келечектеги жолугушууларды, сүйлөшүүлөрдү жана тегерек столдун жүрүшүндө айтылган идеяларды жана чечимдерди ишке ашырууга багытталган биргелешкен долбоорлорду өткөрүүчү жайга айлантууну сунуштады.
Инфлюенсер жана медиа өкүлдөр эс алуунун жаңы маданиятын калыптандырууга - көлдү жана анын экосистемасына аяр мамиле кылууга, туризмдин ички маданиятын өнүктүрүүгө багытталган коммуникациялык кампанияларга жана пилоттук долбоорлорго катышууга даярдыгын билдиришти.
Биринчи “Түштүк Ысык-Көлдүн ЭкоРенессансы” ачык диалог түзүүнүн аянтчасы гана болбостон, мамлекет, бизнес жана коомдун биргелешкен ишинин жана келечектеги долбоорлордун башаты болуп калды.
