Эсеп-фактурадан бошотулган субъекттерден товар сатып алуу тартиби

Мамлекеттик салык кызматы электрондук эсеп-фактураларды колдонуга милдеттүү болгон салык төлөөчүлөр ЭЭФти тариздөөдөн жана катоодон бошотулган сатуучулардан товар сатып алганда, товар тууралуу маалыматтарды өз алдынча ЭЭФтин маалыматтык системасына киргизүүгө милдеттүү экенин эскертет.

Бул жалпы салык режими боюнча салык төлөгөн салык төлөөчү айыл чарба продукциясын өндүрүүчүдөн сатып алуу үчүн эсеп-фактура берген учурларга тиешелүү эмес.

ЭЭФ системасына маалыматты кантип киргизүү керек?

Документти түзүү үчүн esf.salyk.kg сайтына кирип, ЭЭФ МСдагы «Сатып алуу» бөлүмүн ачуу керек, андан соң «БЭБД» бөлүмүн тандап, оң жактагы жогорку бурчта жайгашкан «Кошуу» баскычын басуу зарыл. Ачылган терезеде «Бошотулган субъекттерден сатып алуу» уячасын белгилеп, эсеп-фактураны тариздөө жана колдонуу тартибинин 6-бөлүмүнө ылайык маалыматтарды толтуруу керек.