Түркиялык инвестор Халил Келеш өлкө башчыларына кайрылды
Түркиядан келген инвестор Халил Келеш 3-ноябрда маалымат жыйын өткөрүп өлкө башчысы Садыр Жапаровго жана УКМК башчысы Камчыбек Ташиевге кайрылуу жасады.
Анын айтымында, ал 2022-жылы 25-ноябрда “Д.К” курулуш компаниясы менен Бишкектеги Профсоюз, 125 көчөсүндөгү 15-кабаттуу үйдү куруу келишимин түзгөн. Андан соң ал Түркиядан туннелдик опалубкалар менен 30 курулушчу алып келген.
Бирок, компаниясынын ээси “М” менен финансылык директору “М” аларга керектүү шарт түзбөй, түрк курулушчулар 6 ай бою айлыксыз калган. Ошол себептен Х. Келеш өзү жумушчуларга жатакана куруп, 30 жумушчуга шарт түзгөн.
Кийин компаниянын ээси “М” бардык чыгымдарды төлөп берүүнү убада кылып, докумкентке кол коюп берген. Кийин “Д.К” ээси 150 миң доллар төлөп, калган 352 миң долларды финансылык директор “М” төлөрүн айткан.
“2023-жылы Октябрь РИИБина арыз берилген. 2025-жылдын 15-майында Кыргызстанга келип ИИМге арыз жаздым. Бирок компаниянын ээси менен финансылык директору мени тааныбасын айткандыктан аларга карата иш козгоодон баш тартылды”,-дейт инвестор.
Адвокат Халил Нурмаматовдун айтымында, ушул жылдын сентябрь айында аларга карата кылмыш ишин козгоодон баш тартуу токтому чыккан. Анда жабыркаган тарап сотко кайрылса болору тууралуу жазылган.
