Мал семиртүүчү бир кластер эт керектөөнүн 1%ын гана жабат
Малды семиртүү боюнча бир кластер учурдагы уй этин керектөөнүн болжол менен 1%ын гана камсыздай аларын радионун эфиринде "Кыргыз эт" ассоциациясынын президенти жана мал чарбачылыгы боюнча эксперт Бакыт Мамытканов билдирди.
Анын айтымында, долбоордун алкагында бир кластердик бирикмеге болжол менен 150 млн сом бөлүнөт. Бул каражаттын:
- 82 млн сому семиртүү үчүн мал сатып алууга,
- ал эми калган 68 млн сому өндүрүш чынжырына катышкан тараптардын ортосунда бөлүштүрүлөт.
Бул каражат төмөнкү катышуучуларга багытталат:
- мал семиртүү менен алектенген компанияга,
- мал жеткирүүчүгө,
- продукцияны сатуу менен алектенген катышуучуга.
Эксперттин эсептөөлөрүнө ылайык, бул каражатка бир кластер болжол менен 400–450 баш ири мүйүздүү мал сатып алып, семирте алат.
"Бишкек шаарында күн сайын 300–400 бука союлат. Эгер ушуну эске алсак, бир кластер бере ала турган эттин көлөмү жалпы керектөөнүн болжол менен 1%ына туура келет. Анткени 450 баш малды семиртүү үчүн болжол менен 6 ай убакыт талап кылынат", — деди Мамытканов.
Ал кошумчалагандай, 10 ушундай кластер түзүлгөн күндө да жалпы көлөм 4500 баш малга жетет. Азыркы керектөө деңгээлинде бул рынокту болжол менен 100 күнгө гана камсыздай алат.
Ошол эле учурда эксперт бул долбоор тармак үчүн маанилүү демилге экенин белгиледи, анткени ал пилоттук мүнөзгө ээ жана келечекте кеңейтүүгө мүмкүн.
Анын пикиринде, эгер мындай программаларга жыл сайын, мисалы, 1,5 млрд сомдон каржылоо бөлүнүп турса, анда бир нече жылдын ичинде бул механизмди олуттуу түрдө кеңейтүүгө болот.
Ошондой эле ал пилоттук долбоор алгачкы этапта токтоп калбай, мындан ары да өнүктүрүлүшү абдан маанилүү экенин белгиледи.
