Кыргызстанда транспорт каражаттары үчүн жаңы үлгүдөгү техпаспорт тааныштырылды
Президентке караштуу Иш башкармалыгынын алдындагы Транспорт каражаттарын жана айдоочулук курамды каттоо боюнча мамлекеттик борбордо автоунааларды каттоо тууралуу жаңы үлгүдөгү күбөлүк (техпаспорт) жана "Түндүк" мобилдик тиркемеси аркылуу унааларды онлайн кайра каттоо кызматы тааныштырылды.
Жаңы техпаспорт поликарбонат материалынан жасалып, эскирүүгө абдан туруктуулугу жана жасалма паспорттон күчөтүлгөн коргоосу менен айырмаланат. Документте улуттук оймо-чиймеси бар тунук коргоочу терезе, DOVID-голограмма, колго сезилерлик элементтер, микротекст жана башка заманбап коргоо каражаттары колдонулган. Жеке маалыматтар лазердик оюу түшүрүү ыкмасы менен түшүрүлөт.
Лазердик жабдуулар транспорт каражаттарын каттоо кызматтары көрсөтүлгөн мамлекеттик борбордун бардык бөлүмдөрүнө орнотулган. Бул өлкө боюнча бирдиктүү сапат стандарттарын камсыздоого мүмкүндүк берет.
Ошондой эле, "Түндүк" мобилдик тиркемеси аркылуу автоунааларды онлайн кайра каттоо боюнча санариптик сервис ишке киргизилди. Бул кызмат мамлекеттик маалыматтык системаларда керектүү маалыматтар бар болгон учурда, жарандарга кызматты алыстан, мекемеге барбастан алууга шарт түзөт.
