МИК ААКсы менен Азия өнүктүрүү банкы 65 млн долларга келишим түздү
"Мамлекеттик ипотекалык компания" ачык акционердик коому (МИК) жана Азия өнүктүрүү банкы (АӨБ)жалпы суммасы 65 миллион долларын түзгөн гранттык жана жеңилдетилген насыя каражаттарын бөлүү боюнча келишимге кол коюшту.
Документке 2025-жылдын 25-ноябрында МИКтин башкармалыгынын төрагасы Талант Жекшенов жана Азия өнүктүрүү банкынын Кыргызстандагы өкүлчүлүгүнүн директору Чжэн Ву кол койду. Каржылоо "Жеткиликтүү жана энергияны үнөмдөгөн турак жайга жеткиликтүүлүктү кеңейтүү" долбоорун ишке ашырууга багытталат.
Бул демилге "Менин үйүм" мамлекеттик турак жай программасынын алкагында ишке ашырылып, киреше деңгээли төмөн жана орто жарандарды турак жай менен камсыздоону көздөйт.
Долбоордун негизги өзгөчөлүгү — курулушта заманбап “жашыл” стандарттарды сактоо. Курула турган турак жай объекттери жогорку энергоэффективдүүлүккө жана туруктуулукка ээ болуп, бул келечектеги жашоочулардын эксплуатациялык чыгымдарын азайтууга жана энергетикалык тармакка түшкөн жүктү төмөндөтүүгө мүмкүндүк берет.
Келишимде социалдык аспектилерге жана гендердик теңчиликке өзгөчө көңүл бурулган. Программа калктын аярлуу катмарлары үчүн атайын квоталарды жана колдоо чараларын карайт. Алардын катарына:
- мүмкүнчүлүгү чектелген аялдар;
- жалгыз бой энелер;
- көп балалуу үй-бүлөлөр кирет.
Эл аралык каржы институту менен кызматташуу жарандарды турак жай менен камсыз кылуу менен катар, өлкөнүн курулуш тармагына энергияны үнөмдөөчү алдыңкы технологияларды киргизүүгө өбөлгө түзөт.
