Жеңил өнөр жайына жеңилдик берүү экономиканы көтөрүүгө өбөк болот
Президент С. Жапаров ишкерлер, юридикалык жана жеке жактар үчүн салыктык жеңилдиктерди киргизүү жөнүндө мыйзамга кол койгон. Документте тигүү жана текстиль өнөр жайында иштеген кызматкерлер үчүн киреше салыгын орточо эмгек акынын 1%ына чейин төмөндөтүү, ошондой эле тармактагы бардык субъекттер үчүн орточо эмгек акыдан эсептелүүчү социалдык камсыздандыруу төгүмдөрүнүн бирдиктүү ставкаларын киргизүү каралган.
Кабыл алынган мыйзамга комментарий берип жатып, "Жеңил өнөр жай" ассоциациясынын башкармалыгынын мүчөсү Зарлык Иманкулов бул документ тигүү тармагына олуттуу колдоо болорун мамлекеттик маалымат каражаттарына билдирди.
"Социалдык жана киреше салыктары иш жүзүндө ишкерлердин өздөрү тарабынан төлөнүп келген. Бул бизнеске олуттуу жүк жараткан, анткени түздөн-түз продукциянын өздүк наркына таасир этчү. Натыйжада биз атаандаштыкка жөндөмдүүлүктү жоготуп жаттык", — деп белгиледи ал.
Иманкуловдун айтымында, тигүү тармагынын Кытай, Түркия, Бангладеш жана башка салттуу рынок лидерлери менен атаандаштыкка жөндөмдүүлүгүн жогорулатуу үчүн шарттарды түзүү экономикага күчтүү аккумулятивдик таасир берет. Расмий эмес маалыматтарга ылайык, бул тармакта 200 миңден ашуун адам иштейт, бул өлкөнүн эмгекке жарамдуу калкынын болжол менен 8%ына туура келет.
Ал ошондой эле жеңил өнөр жайындагы абалдын начарлашы соодага да, курулушка да терс таасирин тийгизерин кошумчалады. Анткени бүгүнкү күндө иштеп жаткан тигүүчүлөр турак жай сатып алуучулар болуп, ички суроо-талаптын негизги кыймылдаткычы болуп саналат.
