Быйыл Бишкектеги Спорт сарайын реконструкциялоо иши башталат
Жогорку Кеңештин депутаты Болот Сагынаев бүгүн ЖКнын илим, билим берүү, инновациялык өнүгүү, маалыматтык технологиялар, маданият, спорт жана жаштар иштери боюнча комитетинин жыйынында Бишкек шаарындагы Спорт сарайынын учурдагы абалы боюнча маселени көтөрдү.
Депутат Дене тарбия жана спорт боюнча мамлекеттик агенттиктин директору Казыбек Молдажиевге кайрылып, учурда көптөгөн спорттук объекттер оңдоп-түзөөдөн өтүп жатканын, ал эми жаңыланган "Жаштык-Аренада" иш-чаралардын графиги бир жыл мурда эле толук түзүлүп калганын белгиледи. Анын айтымында, ал жерде концерттер да, спорттук мелдештер да тынымсыз өткөрүлүп жатат.
"Көп объекттер оңдолууда. Бизде болсо Спорт сарайы гана калды. Ал жерде олимпиадалык стандарттагы бассейн да бар. Эгер Спорт сарайы өзүн өзү каржылай алса — бассейнди оңдоп, мончону ишке киргизип, футбол талаасын жасап алмак. Ал шаардын так борборунда жайгашкан, бирок анын абалын өзүңүздөр көрүп жатасыздар", — деди Болот Сагынаев.
Өз кезегинде Казыбек Молдажиев Спорт сарайы боюнча Президенттин тапшырмасы бар экенин билдирди.
"Президент Садыр Нургожоевич “Жаштык-Аренанын” ачылышында Спорт сарайын ушуга окшош форматта оңдоп-түзөө жана реконструкциялоо керектигин айткан. Спорт сарайынын макамы өзгөрбөйт — мурдагыдай эле калат. Мамлекет башчысы Бишкек шаарынын мэри Айбек Жунушалиевге каражат таап, Спорт сарайын оңдоп-түзөөдөн өткөрүү боюнча тапшырма берген. Азыр бул маселе пландарга киргизилди. Кудай буюрса, быйыл эле, жакын арада ишти баштайбыз", — деди ал.
