Салык кызматы ЭСФны жараксыз деп таануу тартибин өзгөртүүнү сунуштады
Мамлекеттик салык кызматы 2023-жылдын 28-апрелиндеги №101 буйругуна өзгөртүүлөрдү киргизүү боюнча долбоорду коомдук талкууга чыгарды. Бул буйрук Салык кодексинин нормаларын ишке ашыруу чараларын жөнгө салат.
Документте "Электрондук эсеп-фактура" маалыматтык системасында (ЭСФ МС) эсеп-фактураларды жараксыз деп таануу тартибин өзгөртүү каралган.
Долбоорго ылайык, салык органдарынын чечим кабыл алуу жол-жоболорун тактоо сунушталууда. Тактап айтканда, комиссиянын маалымкатынын негизинде салык кызматы электрондук эсеп-фактураны жараксыз деп таануу жөнүндө чечимди эки жумуш күнүнүн ичинде түзөт.
Чечим салык төлөөчүгө тапшырылгандан кийин ЭСФ маалыматтык системасында анын тапшырылган күнү көрсөтүлүп, тиешелүү электрондук эсеп-фактуранын статусу "жараксыз" болуп өзгөртүлөт.
Ошондой эле долбоордо мындай чечимди жокко чыгаруу тартиби да каралган. Эгер чечим жокко чыгарылса, салык органы жаңы чечимдин реквизиттерин системага киргизип, эсеп-фактуранын статусун "кабыл алынды" деп өзгөртөт.
Мындан тышкары, учурдагы тартиптеги 22-пункт күчүн жоготту деп табуу, ошондой эле эсеп-фактураларды жараксыз деп таанууда колдонулган чечимдин формасын өзгөртүү сунушталууда.
Бул өзгөртүүлөр электрондук эсеп-фактуралардын маалыматтык системасынын иш тартибин тактоого жана салыктык процесстерди башкарууну жөнөкөйлөтүүгө багытталган.
