МинКаб көрүүсү начар балдар үчүн мектеп-интернатка 10 Брайль машинкасын тапшырды
МинКаб төрагасы Адылбек Касымалиев Бишкек шаарындагы азиз жана көрүүсү начар балдар үчүн атайын мектеп-интернатка Perkins Brailler Classic үлгүсүндөгү 10 жазуучу машинканы тапшырганын өкмөттүн басма сөз кызматы маалымдады.
Бул жабдууларга болгон муктаждык өткөн жылдын сентябрь айында Министрлер Кабинетинин төрагасынын аталган билим берүү мекемесине болгон сапары учурунда айтылган. Жазуучу машинкаларды сатып алуу үчүн төраганын резервдик фондунан 3 миллион сомдон ашык каражат бөлүнгөн.
Жалпысынан 20 даана жабдуу сатып алынган: анын 10у Бишкектеги мектеп-интернатка берилсе, калган 10у Ош шаарындагы көрүүсү начар балдар үчүн мектеп-интернатка өткөрүлүп берилет.
Perkins Brailler Classic Брайль системасы боюнча жазууга үйрөтүүдө колдонулат. Бул машинкалар окуу процессин системалуу жана практикалык багытта уюштурууга мүмкүндүк берип, окуучулардын өз алдынча иштөө көндүмдөрүн өнүктүрөт жана мугалимдердин ишин жеңилдетет.
