В.Путин АКШда тоңдурулган каражаттардан "Тынчтык кеңешине" 1 млрд доллар бөлөрүн билдирди
Россия АКШда тоңдурулган каражаттардан "Тынчтык кеңешине" 1 миллиард доллар бөлүүгө даяр экенин Россиянын президенти Владимир Путин Коопсуздук кеңешинин мүчөлөрү менен өткөн жыйында билдирди.
Өлкө лидери белгилегендей, Россия ар дайым эл аралык туруктуулукту чыңдоого багытталган аракеттерди колдоп келген. Анын айтымында, Россиянын Тышкы иштер министрлиги "Тынчтык кеңешине" кошулуу сунушун изилдеп чыгып, союздаштар менен кеңешкенден кийин Москва расмий жообун берет.
Владимир Путин Дональд Трамптын "Тынчтык кеңешин" түзүү тууралуу сунушу негизинен Жакынкы Чыгыштагы кырдаалды жөнгө салууга жана Палестина маселесин чечүү жолдорун издөөгө багытталганын кошумчалады.
"Эң башкысы — Газа боюнча жүрүп жаткан процесс Жакынкы Чыгыштагы жаңжалды жөнгө салууга оң таасирин тийгизиши керек. Газа секторун калыбына келтирүүдө палестин элинин каалоо-тилектери сөзсүз эске алынышы зарыл. Россиянын палестин эли менен өзгөчө мамилеси бар. Ал АКШда тоңдурулган каражаттардан “Тынчтык кеңешине” 1 миллиард доллар бөлүүгө даяр", — деди ал.
Эске салсак, "Тынчтык кеңешин" түзүү демилгесин АКШ президенти көтөргөн. Дональд Трамп бул кеңешке бир катар мамлекеттердин лидерлерин чакырган.
Буга чейин Ак үйдүн администрациясы Газаны башкаруу боюнча улуттук комитет (NCAG) түзүлгөнүн жарыялаган. "Тынчтык кеңешине" кирүү үчүн 1 млрд доллар төлөө талап кылынат. Кеңештин төрагасы катары Дональд Трамп катышуучуларды чыгарууга же чакырууга, чечимдерге бөгөт коюуга жана жаңы түзүмдөрдү түзүүгө укуктуу болот.
