Кыргызстанда 340 миң тонна кварц кору бар–А.Кылычбаев
Жогорку Кеңештин жыйынында депутат Алтынбек Кылычбаев Кыргызстанда күн панелдерин чыгаруучу завод куруу зарыл экенин билдирди. Анын айтымында, учурда күн панелдерин орнотуу үчүн инвестициялар тартылууда.
"Өндүрүш үчүн негизги чийки зат — кварцит. Бизде кварцтын 340 миң тонна запасы бар. Көптөгөн аймактарда күн панелдерин орнотууну суранышууда. Панелдерди өндүрүү үчүн болжол менен 1 млрд доллар талап кылынат. Күн панелдеринен тышкары, башка да бир катар продукцияларды чыгарууга болот. Натыйжада 6 миң адам жумуш менен камсыз болот", — деди депутат.
Ал бул маселени Энергетика министрлиги башка мамлекеттик органдар менен биргеликте талкуулашы керектигин белгиледи.
Ошондой эле депутаттар "Кайра жаралуучу энергия булактары жөнүндө" мыйзамга киргизилген өзгөртүүлөрдү талкуулашууда. Мыйзам долбооруна ылайык, кайра жаралуучу энергия булактарынын (КЖЭБ) субъекттери электр энергиясын сатуудан түшкөн кирешенин 1%ын жергиликтүү бюджетке которуп турушат. Мындан тышкары, инвесторлор объекттин орнотулган кубаттуулугунун кеминде 30%ына барабар электр энергиясын топтоочу жабдууларды орнотууга милдеттүү болушат.
