Коста-Рика Борбор Азия өлкөлөрүнүн жарандарын убактылуу кабыл алууга макул болду
Коста-Рика АКШдан чыгарылган мигранттарды кабыл алууга макулдук берди. АКШ менен Коста-Риканын бийликтери башка өлкөлөрдөн депортацияланган мигранттарды кабыл алуу боюнча алдын ала келишимге кол коюшту. Коста-Риканын президентинин администрациясы билдиргендей, өлкө жума сайын 25ке чейин мигрантты кабыл ала алат деп Reuters агенттиги кабарлады.
Келишимге ылайык, Вашингтон финансылык жактан колдойт, ал эми Эл аралык миграция уюму тамак-аш жана турак жай менен камсыз кылат.
Буга чейин Коста-Рика АКШдан депортацияланган чет элдик жарандарды кабыл алып келген. 2025-жылдын февраль айында жергиликтүү бийлик АКШдан чыгарылган 200 мигрантты, анын ичинде Индиянын жана Борбор Азия өлкөлөрүнүн жарандарын убактылуу кабыл алууга макул болгон. АКШдан чыгарылган үчүнчү өлкөлөрдүн жарандарын кабыл алууга Панама, Сальвадор, Руанда жана Ливия да мурда макул болушкан.
АКШнын Жогорку соту 2025-жылдын июнь айында мигранттарды үчүнчү өлкөлөргө депортациялоого уруксат берген.
