Мыйзамсыз текшерүү мораторийи 3 тармакка тиешелүү эмес
Президенттин ишкерлерди мыйзамсыз текшерүү боюнча мораторийи 3 тармакка тиешелүү эмес экенин экономика жана коммерция министри Бакыт Сыдыков “Биринчи радионун” түз эфиринде билдирди.
Анын айтымында, бул мораторий же чектөө Салык кызматына, Бажы кызматына жана Жарандык авиация агенттигине жайылбайт.
“Президент Садыр Жапаров 14-мартта ишкердик субъекттерине текшерүүлөрдү жүргүзүүгө убактылуу мораторий киргизүү жөнүндө жарлыкка кол койду. Жарлык ишкердик субъекттеринин экономикалык ишин турукташтырууга, бизнести өнүктүрүүгө багытталган. Жарлыкка ылайык, мамлекеттик текшерүү органдары тарабынан жүргүзүлгөн текшерүүлөргө ушул жылдын 31-декабрына чейин чектөө коюлат. Албетте, бул чектөө Салык кызматына, Бажы кызматына жана Жарандык авиация агенттигине жайылбайт. Анткени алар өз иштерин тынымсыз жүргүзүүгө милдеттүү. Бирок башка текшерүү органдарынын текшерүүлөрүнө 31-декабрга чейин мораторий иштейт”, — деди министр.
Андан тышкары, жарлыктын өзгөчөлүгү катары “достук текшерүү, достук аудит” түшүнүктөрү киргизилип жатканын маалымдады.
“Жарлыктын дагы бир өзгөчө жагы бул “достук текшерүү, достук аудит” деген түшүнүктү киргизип жатабыз. Ага ылайык, бирөөнүн арызына же мамлекеттин коопсуздугун сактоо максатында текшерүүлөр болсо, сиздерге кеңеш берилет. Айып пул жана башка жаза чаралары чектелген”, — деди Сыдыков.
