Кербенде 540 батирлүү ипотекалык турак жай курула баштады
Жалал-Абаддын Кербен шаарында ипотекалык "Хан-Теңири-7" турак жай комплексинин курулушуна расмий түрдө башталды. Бул тууралуу президенттин Иш башкармалыгы билдирди.
Маалыматка ылайык, курулуш иштери Мамлекеттик ипотекалык компания тарабынан каржыланып, долбоор президенттин Иш башкармалыгынын жетекчиси Каныбек Туманбаев көзөмөлүндө ишке ашырылууда.
Долбоордун алкагында 18 блоктон турган алты кабаттуу турак жайлар курулуп, жалпысынан 540 батир пайдаланууга берилет. Анын ичинде 126 бир бөлмөлүү, 306 эки бөлмөлүү жана 108 үч бөлмөлүү батир каралган.
Мындан тышкары, турак жай комплексинде балдар аянтчалары, мектеп, бала бакча, спорттук жана эс алуу жайлары, ошондой эле 453 унаага ылайыкталган автоунаа токтотуучу жай курулат.
Курулуштун башталышына катышкан Каныбек Туманбаев жаңы комплексте жашоочулар үчүн бардык заманбап шарттар түзүлөрүн белгиледи.
Анын айтымында, бул долбоор Садыр Жапаров тарабынан толук колдоого алынып, аймактардагы жарандарды жеткиликтүү турак жай менен камсыз кылууга жана жашоо сапатын жогорулатууга багытталган мамлекеттик саясаттын маанилүү бөлүгү болуп саналат.
