Курулуш министрлиги: жемкорлукка каршы тандоодо 180 кызматкер добуш берди
Бишкек шаар куруу жана архитектура башкы башкармалыгында жемкорлукка каршы “Чынчылдыкты тандоо” аталышындагы акция уюштурулду. Бул тууралуу Курулуш министрлигинин басма сөз кызматы билдирди.
Иш-чаранын алкагында добуш берүү өтүп, ага 200гө жакын кызматкер катышты. Катышуучуларга жасалма интеллекттин жардамы менен даярдалган эки окуянын бирин тандоо сунушталды.
Биринчи окуяда чынчылдык, таза эмгек, санариптештирүү жана бакубат келечек идеялары чагылдырылса, экинчи окуяда жемкорлуктун кесепеттери, анын ичинде кылмыш-жаза жоопкерчилиги жана адамдын мүмкүнчүлүктөрүн жоготуу сыяктуу терс көрүнүштөр көрсөтүлдү.
Добуш берүүнүн жыйынтыгында 148 кызматкер чынчылдыкты жана татыктуу келечекти тандаган. Ал эми 32 катышуучу коррупцияга каршы күрөштө мыйзамдагы жоопкерчиликтин сөзсүз колдонулушу мыйзамсыздыкка бөгөт коюуда маанилүү экенин белгилеген.
Министрлик белгилендей, жыйынтык кызматкерлердин басымдуу бөлүгү үчүн жемкорлуктан баш тартуунун себеби жаза коркунучу гана эмес, ошондой эле чынчылдык, кесиптик этика, жоопкерчилик жана коомго кызмат кылуу экенин көрсөткөн.
