Мыйзам бузгандыгы үчүн төлөм уюмуна 220 миң сом айып пул салынды
КРнын Улуттук банкы Бишкек шаарында жайгашкан төлөм уюмуна/төлөм системасынын операторунун бирине мыйзам талаптарын бузгандыгы үчүн 220 миң сом айып пул салды.
Улуттук банктын маалыматына ылайык, айып пул Кыргыз Республикасынын мыйзамдарын жана Улуттук банктын ченемдик укуктук актыларын бузгандыгы үчүн салынган. Тактап айтканда, төлөм уюму төмөнкү талаптарды аткарбаганы аныкталган:
- Кыргыз Республикасынын банк мыйзамдарына ылайык, ыйгарым укуктуу мамлекеттик органдардын милдеттүү талаптарын аткарбаган;
- кылмыштуу ишти каржылоого жана кылмыштуу кирешелерди легалдаштырууга (адалдоого) каршы аракеттенүү боюнча мыйзамдарда каралган ички көзөмөл системасын уюштуруу талаптарын аткарган эмес.
Улуттук банктын маалыматында айып пул салынган төлөм уюмдун аталышы көрсөтүлгөн эмес. Белгилей кетсек, Улуттук банктын Төлөм системаларынын операторлорунун лицензияларынын реестрине ылайык, учурда Кыргызстанда 55 төлөм уюму жана төлөм системасынын оператору катталган. Алардын бардыгы Бишкек шаарында жайгашкан.
Төлөм уюмдары - товарлар жана кызмат көрсөтүүлөр үчүн төлөмдөрдү кабыл алуу, өткөрүү жана эсептешүү кызматтарын көрсөтсө, төлөм системасынын операторлору - төлөмдөр боюнча финансылык маалыматтарды кабыл алуу, иштеп чыгуу (процессинг, клиринг) жана катышуучуларга жеткирүү функцияларын аткарат.
