ЖК комитети жашы жете электердин чет өлкөлөргө чыгуусун жөнгө салуучу мыйзам долбоорун жактырды
ЖК комитети 6-октябрда жашы жете электердин чет өлкөлөргө чыгуусун жөнгө салуучу мыйзам долбоорун биринчи окууда кабыл алды. Чечим Кыргыз Республикасынын Жогорку Кеңешинин Сот-укук маселелери, укук тартиби, кылмыштуулук менен күрөшүү жана коррупцияга каршы аракеттенүү боюнча комитети тарабынан кабыл алынды.
Юстиция министрлигинин орун басары Кубан Казаков билдиргендей айрым мыйзам чыгаруу актыларындагы оңдоолор жашы жете электерди чет өлкөлөргө чыгарууну жеңилдетүүгө багытталган.
Анын ичинде баланы чет элге дарылатуу, мектеп олимпиадаларына, спорттук иш-чараларга ата-эненин биринин уруксатынын нотариалдык ырастамасыз убактылуу чыгаруу сунушталууда.
Бул үчүн баланы коштоп барып келүүчү ата-эненин биринин макулдук нотариалдык күбөлүгү, Кыргызстанга белгиленген мөөңөттө алып келүү керектелет.
Мындай шарт ата-эненин экөөсү тең Кыргызстандын атуулу болгон учурда иштейт. Сапардын максаты саламаттыкты сактоо, билим берүү, маданият же спорт жааттагы мамлекеттик органдардын документтери менен бекитилиши кажет.
Мыйзам долбоор баланы Кыргызстандын чегинен тышкары чыгуу мөөңөтү бүткөндө атайлап кармоо жаатын да камтыйт. Мындай аракет үчүн 100 000 сом айып салуу же 3 жылга эркинен ажыратуу сунушталууда.
