Ош аэропортунан курамында тыюу салынган продукциянын өтүшүнө бөгөт коюлду
Мамлекеттик салык кызматынын кызматкерлери Ош шаарында жүргүзүлгөн текшерүү иш-чараларынын жүрүшүндө тыюу салынган курамында никотин бар продукцияны алып кирүү аракетин аныкташты. Бул тууралуу аталган кызматтан кабарлашты.
Билдирүүгө караганда, аэропорттун текшерүү зонасында жүктөрдү кароо учурунда алдын ала баасы 1 млн 200 миң сомдон ашкан, курамында никотини бар чайноочу аралашма түрүндөгү (снюс) 2 миң 497 даана продукция табылып, тартылып алынган.
Бул факты боюнча тиешелүү актылар түзүлүп, материалдар КРнын мыйзамдарына ылайык текшерүү жүргүзүү жана укуктук баа берүү үчүн укук коргоо органдарына өткөрүлүп берилди.
Эскертүү: Өлкө аймагында чегилбей турган тамеки заттарын жана курамында никотин бар чегилбей турган заттарды өндүрүүгө, Кыргыз Республикасына алып кирүүгө жана жүгүртүүгө, анын ичинде сактоого, дүң жана чекене сатууга, ошондой эле өлкөдөн алып чыгууга тыюу салынган.
