Чет өлкөдөн кармалган Сыргак Кенжебаев 13-ноябрга чейин камалды
Чет өлкөдөн кармалып, Кыргызстанга алынып келген ишкер, активист Сыргак Кенжебаев 13-ноябрга чейин камакка алынды. Бул тууралуу Биринчи май райондук соту 13-октябрда чыгарды.
Райондук соттун маалыматына ылайык, аны камакка алуу өтүнүчүн Ички иштер министрлигинин (ИИМ) Тергөө кызматынын тергөөчүсү берип, судья активистке мурда колдонулган камакка алуу түрүндөгү бөгөт чарасынын мөөнөтүн 13-ноябрга чейин деп аныктады. Ага Кылмыш-жаза кодексинин “Массалык башаламандыктар” жана “Алдамчылык” беренелери менен айып тагылууда.
ИИМ Сыргак Кенжебаев чет өлкөдөн кармалып, өлкөгө алынып келгенин 13-октябрда кабарлаган. Министрлик ал массалык башаламандыкка чакыруу жана бир адамдан (М.Н.) чогуу ишкердик жүргүзүү шылтоосу менен 150 миң доллар алып, алдап кеткен деп шектелип жатканын билдирген.
Сыргак Кенжебаев 44 жашта, ишкер. Ал 2018-жылы Инвестиция тартуу агенттигинде жетекчинин орун басары болуп иштегени, ага чейин “Юнилаб” деп аталган логистикалык компанияны жетектегени ачык булактарда көрсөтүлгөн.
