Декабрдан тарта күч түзүмдөрүнүн айлыгы көбөйөт
2026-жылдын декабрь айынан тарта укук коргоо органдарынын кызматкерлеринин жана аскер кызматчыларынын акчалай камсыздоосу жогорулайт. Бул тууралуу Ички иштер министрлиги билдирди.
Маалымдалгандай, президенттин 2024-жылдын 18-октябрындагы №299 Жарлыгына өзгөртүү киргизилди. Ага ылайык, 1-декабрдан тарта кызматкерлердин кызматтык маянасы 10 миң сомго көбөйүп, укук коргоо органдарында жана аскердик кызмат үчүн үстөк акылар азайтылат.
Айлык камсыздоо ээлеген кызматына, наамына, кызмат өтөгөн жылдарына жараша өзгөрөт. Кызматка жаңы кирген, стажы жок кызматкердин айлыгы кеминде 4 миң сомго көбөйөт.
Пенсияга чыгууга жетиштүү стаж топтогондордун айлыгы кызматына жана стажына жараша 10 миң сомдон ашык көбөйөт.
Маянанын өсүшүнө байланыштуу өргүү акысы, бошотуу жөлөкпулдары жана камсыздандыруу төлөмдөрү да көбөйөт.
Күч түзүмдөрүнүн пенсионерлеринин пенсиясы да 10 миң сомго чейин жогорулайт.
